Адыгэ лъэпкъ Iофлэжьхэм я Совет адыгэ сатыушlэхэм ыкlи бизнесменхэм афакlорэ джэпсалъэу къышlыгъэр
Тилъэпкъэгъу лъапlэхэр!
Адыгабзэм ылъэныкъокlэ гумэкlыгъоу щыlэхэм апкъ къикlэу зыкъышъуфэтэгъазэ. Адыгэ Республикэм ицlыф зэхэхьэ купэу "Адыгэ КIотэныгъ" (Черкесский прогресс) адыгабзэм изытет фэгъэхьыгъэ джэпсалъэ мэзэ заулэкlэ узэкlэlэбэжьмэ къышlыгъагъ, ар куп зэхахьэм исайт ит (circassianprogress). Адыгабзэм изэгъэшlэн закъоп, ащ игъэфедэн ыкlи ихэхъоныгъэхэм тизэхахьэ ащ къыщыфаджэ.
Блэкlыгъэ илъэсым УФ-м и Къэралыгъо Думэ бзэхэр шlокl имыlэу зэбгъэшlэнхэу щымытэу (урысыбзэм нэмыкlхэрэр) зештэм ыуж, ау щытми кlодыжьыпlэ ифэгъэ бзэхэм язытет нахь дэй хъугъэ. Ау джыри федеральнэ, республикэ хэбзэгъэуцугъэхэм ыкlи къэралыгъом ихэбзэ шъхьаlэу УФ-м и Конституцие ахэтых тхыгъэхэу лъэпкъхэм яфитыныгъэхэм ягъэцэкlэнкlэ амал къэзытыхэрэр. Лlэуж зэфэшъхьафхэу зиуахътэ, зыкlуачlэ, зищыlэныгъэ ащ фэзгъэхьыгъэхэм ар яхьатырэу хъугъэ.
Тиреспубликэхэм къэралыгъуабзэхэр тыди ыкlи ренэу ащыдгъэфедэнхэ фай, бзэм lоф ышlэнымкlэ, ащ къыкlэлъыкlоу лъэпкъым икъэухъумэнкlэ ащ мэхьэнэ ин иl.
Ары, лъэпкъым ицlыф зэхахьэхэм мы lофыгъомкlэ УФ-м, Республикэхэмм япащэхэм, политикэ партиехэм зафагъазэ. Тифитыныгъэхэр ыкlи тишlоигъоныгъэхэр къэтыухъумэнхэм пае ар тэшlэ, ежь лъэпкъыхэм икъу фэдизэу зэхашlэ ямыlэмэ, хэгъэгу горэми лъэпкъыхэм яфитыныгъэхэм икъоу уасэ афишlыщтэп.
Непэ зэкlэми тэлъэгъу къэбарзехьэхэм, фирмэхэм ацlэхэм, ащэрэр, яфэlо-фашlэхэр зыщытхыгъэхэм, яlофшlакlэ зэрэгъэпсыгъэм ыкlи ащ фэдэхэм адыгабзэр макlэу зэрэщагъэфедэрэр.
Къэралыгъо къулыкъу, lофшlапlэ зэфэшъхьафхэм ащкlэ охътабэ ыкlи зэгъэзэфэныгъабэ ящыкlагъэмэ, бизнесым пылъхэм тхыгъэр адыгабзэкlэ зэрадзэкlыным пае такъикъ е мэфэ заул, анахьыбэмэ тхьэмаф тефэщтыр. Мафэ къэс фэдэ рекламэ ашlы, етlани ар агъэуцугъахэми фэдэ зэхъокlыныгъэхэр фэпшlынхэ плъэкlыщт. Ащ мылъкубэ тефэщтэп, кlэу пшlын зыхъукlэ зы бзэм паекlи, бзэ заулэм апаекlи уасэр зэфэдэ. Арэу зыхъукlэ адыгабзэм изэгъэшlэн игъэпытэн къэлъагъоу ыкlи шlуагъэ зиlэ шъуиlахь хэшъулъхьэт.
Адыгэ республики 3 ащыпсэухэрэм фэдэ амалхэр яlэх ыкlэ ащ фэдиз амал яlэп хэгъэгум инэмыкl чlыпlэхэм ащыпсэурэ адыгэхэм. Ахэр дгъэфедэнхэ фай, икъоу ар тымыгъэцакlэмэ, мы амалхэри чlэтынэщтых.
Бзэм, лъэпкъ зэхашlэм яухъумэн шъухэлэжьэнэу тыкъышъуаджэ, ар джырэкlэ зыгъэцакlэхэрэм лъэшэу тафэраз. Типшъэрылъэу тшlэн фаер тымыгъэцакlэмэ тичlыпlэ нэмыкlхэм аубытыщт. Тхьам гукlэгъу къытфишlын.
Адыгэ лъэпкъ Iофлэжьхэм я Совет :
Щэрджэс Мухьамэд, общественнэ lофышl, (Къэрэщай-Черкес Республикэ)
Цундышк Заурбый, Мыекъуапэ ицlыф куп зэхахьэу "Адыгэ Хасэ - Черкесский Совет" итхьэмат, (Адыгэ )Республикэ)
Ягъэнэ Ибрахьим, общественнэ lофышl, (Къэбартае-Бэлкъар Республикэ)
Яхъулlэ Юрий, общественнэ lофышl, (Адыгэ Республикэ)
Къокlаскъо Мартин, цlыф куп зэхахьэу "Хабзэ" ипрезидент, (Къэбартае-Бэлкъар Республикэ)
Зыхьэ Амин, общественнэ lофышl, (Адыгэ Республикэ)
Агыр Аслъан, цlыф куп зэхахьэу "Адыгэ КIотэныгъ" (Черкесский Прогресс) итхьэмат, (Адыгэ Республикэ)
31.05.2019