четверг, 26 июня 2014 г.

Украинэ цIыфхэр Адыгеим къыращэх

ЗэутэкIыныгъэхэр джырэкIэ зыщыхъурэ Украинэм къикIыгъэхэ цIыф нэбгыри I60 ехъу Адыгеим щыIэх. Фэдэ цIыф пчъагъэмэ якъэтынхэр къетхых «Регнум» зыфиIорэ интернет къэбар лъыгъэIэс къулыкъум.
Джыри ятIонэрэ купыр Ростов шъолъырым  къыращэныр къыдхэлъытагъ. Хэкум щыIэ украинэ цIыфхэр чIэсых Мыекъопэ шъолъырым игъэпсэфыпIэ чIыпIэхэм ащыщым, къэбар къулыкъухэм къызэратхырэмкIэ.

ДжырэкIэ хэку унэшъошIхэм ялъэкI зэкIэ рахьылIэнэу къыхагъэщыгъ украинэм щыщхэу хэкум къэкIуагъэхэм IэпыIэгъу афэхъунхэмкIэ. Анахьыбэу ахэр Украинэм и Луганск ыкIи Донецкэ шъолъырхэм ащыщых.

Адыгеим ихьыкумэт унашъоу ыштагъэмкIэ хэкум ыкIоцI охътэ гъэнэфагъэм телъытагъэу чIыпIи 9 щагъэпсынэу ары нэбгырэ минрэ ныкъорэмэ апае, къетхы «регнум» къэбар къулыкъум.

Адыгеим щыIэ бэдауш купхэм ахэтыбэхэм гукъаоу къыхагъэщы адыгэ лъэпкъэгъухэу, зао зыщыкIорэ Сирием къыкIыжьын фае хъугъэхэм икъу фэдизэу IэпыIэгъу зэрарамыгъэкIрэр, украинэ егъэзыгъэ хъугъэ цIыфхэм ягъэпшагъэми.

Фитыныгъэ радиом игущыIэгъугъэ Мыекъопэ Адыгэ Хасэм ипащэу Чундышко Заурбый къызэрэхигъэщрэмкIэ, адыгэ лъэпкъэгъухэм Адыгеим къэкIожьынхэмкIэ квотэ гъэнэфагъэхэр илъэсым ателъытагъэми, Украинэм щыщхэр къэралыгъо унэшъо гъэнэфагъэкIэ мин заулэ хъоу къырагъахьэх.

Чундышко Заурбый: Сэ сыгу хэкIы. Украинэм къикIхэрэм угу ягъунэу щыт, арау тэтыемэ узялъэIукIэ Сирием къикIыжьыгъэадыгэхэм IэпыIэгъу къафэхъунхэмкIэ, Мэзкуу къытфидэрэп аIо. Квотэхэу 450 хъущтыгъэхэр 300 кIэхьагъ. Ахэм ащыщэу 50 ары адыгэмэ ателъытагъэр.

Фитыныгъэ Радио: Заурбый, адыгэ лъэпкъэгъухэу Сирием къикIыжьыгъэхэм зызэрагъэпсэуалъэрэм уегъэраза?

Чундышко Заурбый:  Iоф зышIэхэрэр ахэт, арау нахьыбэрэм IофшIапIэ зымыгъотыгъэхэр бэх. Ятхьапэхэм япхыгъэ  Iофыгъохэри бэх. Хабзэм афишIэн фаер икъоу слъытэрэп. Мары, украинэм щыщхэм апае зычIэсыни, ашхыни къафагъоты.

Фитыныгъэ Радиом игущыIэгъугъэ Мыекъопэ Адыгэ Хасэм ипащэу Чундышко Заурбый гукъаоу къыхегъэщы, ащ фэдэу адыгэ лъэпкъэгъухэм къазэрафыщымытхэмкIэ.

Адыгеим джырэкIэ Сирием щыщ адыгэ лъэпкъэгъухэм апае къуаджэу Мэфэхьаблэ чIыгухэр къафхагъэкIыгъэх, унэхэр атырашIыхьаным пае. Къэбэртэе-Бэлкъарыми Сирием къикIыжьыгъэхэ адыгэ лъэпкъэгъухэу щыIэхэм емызэгъхэр къыхагъэщых. «Натпресс» къэбар къулыкъум къызэритхырэмкIэ, ахэр зычIэсыщтхэ псэупIэхэмкIэ Iофыгъохэм яутэкIых.

Щэрджэс Ларис, Фитыныгъэ Радиом пае.