Мыекъопэ къэлэ хасэм конференцие ышIынэу зыфегъэхьэзыры


Щылэ мазэ и 28-м, Адыгэ Республикэм щылажьэрэ Мыекъопэ къэлэ хасэ "Адыгэ Хасэ - Черкес Советым" и гъэцэкIакIо-куп зэхэсыгъо иIагъ. Ар хасэм Мыекъуапэ Iофисэу щриIэм щыкIуагъ. 

Зэхэсыгъор хасэм итхьэматэу Цундышк Заурбый зэрищагъ. Iоф шъхьэIэу тхьэматэм къыхилъхьагъэр, гъэтхапэм, хасэм конференциеу къыригъэкIокIыщтыр ары. АщкIэ, уахътэу конференциер зашIыщтыр пыупчIыгъэу рахъухьагъэ, ау, ар гъэтхапэ мазэм къырагъэкIокIынэу зэдащтагъ ыкIи а конференцием игъэхьэзырын тхьэматэм ыкIи гъэцэкIакIо-купым хэтхэм пшъэрылъхэр зыталъхьэжьыгъэх. 

ЯтIуанэрэ Iофэу хасэр зытегущыIагъэр, хэкум къэзыгъэзэжьыгъэхэр унхэм итхэгъэныхэм (пропискэ) Iофэу къыпыкIыхэрэр ары. МыщкIэ, гъэцэкIакIо купым хэтхэм яеплъыкIэкIэ, пропискэ Iофыр Республикэм ихьыкумэт зэшIуихынэу пшъэрылъ телъ ыкIи ащ елъытыгъэу зэдащтагъ Адыгэ республикэм ипащэхэм зыфагъэзэнэу. Мы Iофыр лъымыкIуатэмэ нэмыкI акциехэр, митингхэр е пикетхэр ашIынхэу зэдащтагъ.